របាយការណ៍ថ្មីៗ
|
§ នាថ្ងៃទី៣១ ខែកក្កដា ដល់ថ្ងៃទី០៤
ខែសីហា ៖ នាយកដ្ឋានអភិវឌ្ឍន៍សហគមន៍
បានដំណើរការចុះជួបសម្ភាសន៍ផ្ទាល់ជាមួយសហគមន៍មួយចំនួន
ក្នុងខេត្តបាត់ដំបង ដែលជាជំហានដំបូងសម្រាប់គម្រោងសិក្សាស្រាវជ្រាវដើម្បីចងក្រង
“សៀវភៅណែនាំស្តីពីការអភិវឌ្ឍសហគមន៍ក្រីក្រនៅតំបន់ទីប្រជុំជន”។ ការចុះជួបសម្ភាសន៍នេះ
គឺដើម្បីប្រមូលធាតុចូលសំខាន់ៗទាក់ទងទៅនឹងបទពិសោធន៍ និងភាពជោគជ័យរបស់សហគមន៍ទាំងនោះ
ដើម្បីរៀបចំសៀវភៅណែនាំនោះអោយកាន់តែល្អប្រសើរ។
§ នាថ្ងៃទ២៤ ខែកក្កដា ៖ លោក ទ្រី សុជាតិ ប្រធាននាយកដ្ឋានបណ្តុះបណ្តាល និងការអភិវឌ្ឍ
បានទៅចូលរួមសិក្ខាសាលាចាប់ផ្តើមអនុវត្តគម្រោងប្រូសែហ្វៈ “ការលើកកម្ពស់សុវត្ថភាពចំណីអាហារសម្រាប់យើងទាំងអស់គ្នា” ដោយរៀបចំឡើងដោយវិទ្យាស្ថានមេគង្គ ប្រទេសថៃ។
ក្នុងគោលបំណងប្រមូលធាតុចូលពីស្ថាប័នពាក់ព័ន្ធក្នុងប្រទេសកម្ពុជា
ឲ្យបន្ថែមការប្រុងប្រយ័ត្ន និងចូលរួមចំណែកផ្សព្វផ្សាយ
ព្រមទាំងលើកកម្ពស់សុខុមាលភាពដល់ប្រជាជនទូទៅ។
§ នាថ្ងៃទី២៣
ខែកក្កដា ៖ តំណាងអគ្គលេខាធិការដ្ឋាន ដឹកនាំដោយឯកឧត្តម ប៉ូច ប៊ុណ្ណាក់ បានអញ្ជើញចូលរួមកិច្ចប្រជុំពិភាក្សា ដើម្បីពង្រឹងទំនាក់ទំនងរវាងសកលវិទ្យាល័យLIMKOKWING ជាមួយនឹងអគ្គលេខាធិការដ្ឋាន
នៅសកលវិទ្យាល័យLIMKOKWING។
§ នាថ្ងៃទី១៣ ខែកក្កដា ៖ អគ្គលេខាធិការដ្ឋាន
បានជួយសម្របសម្រួលការងាររួមរបស់ក្រសួងក្នុងការរៀបចំកិច្ចប្រជុំពិនិត្យនិងពិភាក្សាលើសេចក្តីព្រាងរបាយការណ៍ជាតិស្តីពី”ការអនុវត្តកម្មវីធីសកម្មភាពនៃកិច្ចប្រជុំអន្តរជាតិស្តីពីប្រជាជននិងការអភិវឌ្ឍ” ដែលកិច្ចប្រជុំនោះដឹកនាំដោយ
ឯកឧត្តម ទួន ថាវរៈ រដ្ឋលេខាធិការ ដែលប្រព្រឹត្តនៅសណ្ឋាគារភ្នំពេញ។
គោលបំណងនៃកិច្ចប្រជុំនោះ
គឺដើម្បីពិនិត្យនិងពិភាក្សាលើខ្លឹមសារនៃសេចក្តីព្រាងនិងសូចនាករ និងដើម្បីកែលម្អសេចក្តីព្រាងរបាយការណ៍អោយមានលក្ខណៈពេញលេញសម្រាប់ជាធាតុចូល
ក្នុងការវាយតម្លៃវឌ្ឍនភាពឆ្ពោះទៅរកការសម្រេចបាននូវសេចក្តីថ្លែងការណ៍សកលថ្នាក់រដ្ឋមន្ត្រីតំបន់អាស៊ីប៉ាស៊ីហ្វិចស្តីពីប្រជាជននិងការអភិវឌ្ឍ
និងសន្និសីទអន្តររដ្ឋាភិបាល ស្តីពីប្រជាជននិងការអភិវឌ្ឍ
និងកំណត់អាទិភាពនានាសម្រាប់ការអនុវត្តនាពេលអនាគត ដើម្បីសម្រេចបាននូវរបៀបវារៈឆ្នាំ២០៣០
សម្រាប់ការអភិវឌ្ឍប្រកបដោយចីរភាព។
§
នាថ្ងៃទី១១ ខែកក្កដា ៖ អគ្គលេខាធិការដ្ឋាន បានរៀបចំកម្មវិធី អបអរសាទរ «ទិវាប្រជាជនពិភព លោក ១១ កក្កដា លើកទី២៩» ក្រោមប្រធានបទ «ផែនការគ្រួសារ គឺជាសិទ្ធិមនុស្ស» ក្រោមអធិបតីភាព ឯកឧត្តម
ឆាយ ថន ទេសរដ្ឋមន្រ្តី រដ្ឋមន្រ្តីក្រសួងផែនការ ។ គោលបំណងសំខាន់គឺដើម្បី៖ -ផ្សព្វផ្សាយសារលិខិតសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា
។ -ដើម្បីរំលឹក និងជំរុញបន្ថែមដល់ថ្នាក់ដឹកនាំ មន្រ្តីរាជការ កងកម្លាំងប្រដាប់អាវុធ
បញ្ញាវន្ត សិស្សនិស្សិត និងអ្នកមានចំណែកពាក់ព័ន្ធទាំងអស់ ព្រមទាំងប្រជាពលរដ្ឋគ្រប់រូបឲ្យបន្តកិច្ចខិតខំប្រឹងប្រែង
ដើម្បីបុព្វហេតុប្រជាជន និងការអភិវឌ្ឍ ជាពិសេស កិច្ចខិតខំប្រឹងប្រែងស្វែងរកដំដោះស្រាយនៃបញ្ហាទាក់ទងនឹងកំណើនប្រជាជនដែលកំពុងជះឥទ្ធិពលដល់ការអភិវឌ្ឍ
។ -បញ្ជាក់ថាផែនការគ្រួសារ គឺជាសិទ្ធិមនុស្ស មានអត្ថប្រយោជន៍យ៉ាងជ្រាលជ្រៅផ្សារភ្ជាប់គ្នាទៅនឹងកិច្ចខិតខំប្រឹងប្រែងនិងសកម្មភាពជាក់ស្តែងរបស់រាជរដ្ឋាភិបាល
ផ្តោតលើការកាត់បន្ថយភាពក្រក្រី ការពង្រឹងសិទ្ធិអំណាចរបស់ស្រ្តី ព្រមទាំងការខិតខំប្រឹងប្រែងបន្ថែមទៀត
ដើម្បីបុព្វហេតុស្ត្រី ក្នុងការចូលរួម ការអភិវឌ្ឍសេដ្ឋកិច្ច និងសង្គម ។
§ ឯកឧត្តម ប៉ូច ប៊ុណ្ណាក់
បានបន្តដឹកនាំកិច្ចប្រជុំជាមួយប្រធាននាយកដ្ឋានអភិវឌ្ឍន៍សហគមន៍ និងមន្ត្រីបច្ចេកទេស
ដើម្បីសម្រេច ឲ្យបានសៀវភៅ “សន្ទានុក្រម ប្រជាសាស្ត្រ” គោលបំណងចំបងនៃការរៀបចំសៀវភៅសន្ទានុក្រមនេះ
គឺដើម្បីផ្តល់ភាពងាយស្រួលដល់អ្នកសិក្សាពាក់ព័ន្ធទៅនឹងប្រជាសាស្ត្រ
យល់ច្បាស់និងទទួលបានចំណេះដឹង កាន់តែស៊ីជម្រៅទាក់ទងនឹងពាក្យគន្លឹះសំខាន់ៗ។
§ នាយកដ្ឋានអភិវឌ្ឍន៍សហគមន៍ បានកំពុងរៀបចំលិខិតរដ្ឋបាល
ដើម្បីសុំសហការជា មួយនឹងប្រធានមន្ទីររាជធានីភ្នំពេញ សៀមរាប បន្ទាយមានជ័យ
ក្នុងការជួយសម្របសម្រួលការងារមន្ត្រី និងថ្នាក់ដឹកនាំនៃអគ្គលេខាធិការដ្ឋាន
ក្នុងការចុះសម្ភាសន៍ផ្ទាល់ ជាមួយប្រធានភូមិ ប្រធានសហគមន៍ នៃសហគមន៍ជោគជ័យ
សម្រាប់គម្រោងសិក្សាស្រាវជ្រាវដើម្បីចងក្រង “សៀវភៅណែនាំស្តីពីការអភិវឌ្ឍសហគមន៍ក្រីក្រនៅតំបន់ទីប្រជុំជន”។
§
នាយកដ្ឋានបណ្តុះបណ្តាលនិងការអភិវឌ្ឍ បានកំពុងរៀបចំលិខិតអញ្ជើញ
លិខិតរដ្ឋបាលផ្សេងៗ និងរៀបចំការងារបច្ចេកទេស ដើម្បីប្រតិបត្តការវគ្គបណ្តុះបណ្តាលស្តីពី “ការកសាងសមត្ថភាពនិងការអភិវឌ្ឍ
ធនធានមនុស្ស ស្រាវជ្រាវបញ្ហាពាក់ព័ន្ធនឹងប្រជាជននិងការអភិវឌ្ឍ” នៅបីតំបន់ផ្សេងៗទៀត។
§ ក្រុមការងារបច្ចេកទេស នៃនាយកដ្ឋានបណ្តុះបណ្តាលនិងការអភិវឌ្ឍ បានសហការជាមួយនាយកដ្ឋានផ្សព្វផ្សាយ
និងព័ត៌មាន ដើម្បីបង្កើនការផ្សព្វផ្សាយអំពីសកម្មភាពរបស់អគ្គលេខាធិការដ្ឋានប្រជាជននិងការអភិវឌ្ឍ
គោលបំណងសំខាន់នៃការផ្សព្វផ្សាយនេះ គឺដើម្បីបង្ហាញនៅសកម្មភាពសំខាន់ៗ
និងភាពសកម្មរបស់ អគ្គលេខាធិការដ្ឋាន ក្នុងការរួមចំណែកដើម្បីសំរេចបាននៅគោលនយោបាយរួមរបស់ក្រសួងផែនការ។
§នាយកដ្ឋានផ្សព្វផ្សាយនិងព័ត៌មាន បានរៀបចំសិក្ខាសាលាស្តីពី”ការជុំរុញការអនុវត្តគោលនយោបាយជាតិប្រជាជន ២០១៦-២០៣០ ក្នុងក្របខ័ណ្ឌគោលដៅអភិវឌ្ឍន៍ប្រកបដោយចីរភាពកម្ពុជា”
ជាបន្តបន្ទាប់តាមផែនការសកម្មភាពដែលនាយកដ្នានបានស្នើឡើង។
§
នាយកដ្ឋានផ្សព្វផ្សាយនិងព័ត៌មាន
បន្តដំណើរការរៀបចំកែសម្រួលគំរូប្លង់នៃព្រឹត្តិបត្រព័ត៌មាននិងខ្លឹមសារអត្ថបទខី្លៗសី្តពីសកម្មរបស់ថា្នក់ដឹកនាំអគ្គលេខាធិការដ្ឋាន
និងថ្នាក់ដឹកនាំក្រសួង ដើម្បីបោះពុម្ពផ្សព្វផ្សាយជូនដល់មហាជន ស្ថាប័ន
និងដៃគូអភិវឌ្ឍន៍ដ៏ទៃទៀត អោយស្គាល់ពីតួនាទី ភារកិច្ចរបស់អគ្គលេខាធិការដ្ឋាន។
§ នាយកដ្ឋានវិភាគគោលនយោបាយប្រជាជន បានរៀបចំសំណើសុំសហការ
និងបញ្ជូនទៅតាមស្ថាប័នពាក់ព័ន្ធ
ដើម្បីបង្កើតក្រុមការងារអន្តរក្រសួងសម្រាប់តាមដានត្រួតពិនិត្យនិងវាយតម្លៃការអនុវត្ត”គោលនយោបាយជាតិប្រជាជន
២០១៦-២០៣០”។ គោលបណងចំបងនៃការបងើ្កតក្រុមការងារនេះឡើង គឺដើម្បីសម្រេចបានចក្ខុវិស័យរបស់គោលនយោបាយគឺបន្តលើកកម្ពស់
អោយកាន់តែប្រសើរឡើងនូវគុណភាពជីវិត និងសុខុមាលភាព របស់ប្រជាជនកម្ពុជាទាំងអស់។
§ នាយកដ្ឋានវិភាគគោលនយោបាយប្រជាជន
កំពុងបន្តប្រមូលធាតុចូល ដើម្បីកែសម្រួល និងរៀបចំ”របាយការណ៍វឌ្ឍនភាពឆ្នាំ២០១៧ នៃលទ្ធផលអនុវត្តផែនការសកម្មភាព
២០១៦-២០១៨ នៃគោលនយោបាយជាតិប្រជាជន ២០១៦-២០៣០” គោលបំណងសំខាន់គឺដើម្បី -ឆ្លុះបញ្ចាំងពីការប្តេជ្ញាចិត្ត
និងកិច្ចខិតខំប្រឹងប្រែងរបស់ក្រសួង ស្ថាប័នដែលទទួលខុសត្រូវអនុវត្តផែនការសកម្មភាព២០១៦-២០១៨
-រាយការណ៍ពីលទ្ធផលរយៈពេលខ្លី និងមធ្យមនៃកម្មវិធី គម្រោង និងសកម្មភាពរបស់អ្នកដែលមានចំណែកពាក់ព័ទ្ធ
ក្នុងការអនុវត្តគោលនយោបាយជាតិប្រជាជន ២០១៦-២០៣០
-វាយតម្លៃអំពីវឌ្ឍនភាពនៃការអនុវត្តផែនការសកម្មភាព២០១៦-២០១៨ នៃគោលនយោបាយជាតិប្រជាជន
២០១៦-២០៣០ ដែលបានអនុវត្តដោយក្រសួងពាក់ព័ន្ធ -បង្ហាញអំពីសកម្មភាពនៅក្នុងអាទិភាពដែលត្រូវតាមដាន
និងពិនិត្យមើលឡើងវិញដើម្បីបន្តការអនុវត្ត និងការអភិវឌ្ឍបន្ថែមទៀតនៅឆ្នាំខាងមុខ។
|
ជំហានបន្ទាប់ និងទិសដៅការងារ
|
§ នាយកដ្ឋានបណ្តុះបណ្តាលការអភិវឌ្ឍបន្តរៀបចំការងារបច្ចេកទេស
និងផែនការសម្រាប់ដំណើរការវគ្គបណ្តុះបណ្តាលស្តីពី “ការកសាងសមត្ថភាពនិងការអភិវឌ្ឍ
ធនធានមនុស្ស ស្រាវជ្រាវបញ្ហាពាក់ព័ន្ធនឹងប្រជាជននិងការអភិវឌ្ឍ” នៅបីតំបន់ផ្សេងៗទៀត។
§ នាយកដ្ឋានអភិវឌ្ឍន៍សហគមន៍ បន្តអនុវត្តការងារសម្រាប់គម្រោងសិក្សាស្រាវជ្រាវដើម្បីចងក្រង
“សៀវភៅណែនាំស្តីពីការអភិវឌ្ឍសហគមន៍ក្រីក្រនៅតំបន់ទីប្រជុំជន” ។
§ នាយកដ្ឋានវិភាគគោលនយោបាយប្រជាជន
និងរៀបចំបង្កើតក្រុមការងារបច្ចេកទេសដើម្បីរៀបចំ”សេចក្តីព្រាងផែនការសកម្មភាព ២០១៩-២០២១
នៃគោលនយោបាយជាតិប្រជាជន២០១៦-២០៣០”។
§ នាយកដ្ឋានផ្សព្វផ្សាយនិងព័ត៌មាន បន្តរៀបចំសិក្ខាសាលាស្តីពី”ការជុំរុញការអនុវត្តគោលនយោបាយជាតិប្រជាជន ២០១៦-២០៣០
ក្នុងក្របខ័ណ្ឌគោលដៅអភិវឌ្ឍន៍ប្រកបដោយចីរភាពកម្ពុជា”។
§ នាយកដ្ឋានផ្សព្វផ្សាយនិងព័ត៌មាន
បន្តដំណើរការរៀបចំកែសម្រួលគំរូប្លង់នៃព្រឹត្តិបត្រព័ត៌មាននិងខ្លឹមសារអត្ថបទខី្លៗសី្តពីសកម្មរបស់ថា្នក់ដឹកនាំអគ្គលេខាធិការដ្ឋាន
និងថ្នាក់ដឹកនាំក្រសួង ដើម្បីបោះពុម្ភផ្សព្វផ្សាយជូនដល់មហាជន ស្ថាប័ន
និងដៃគូអភិវឌ្ឍន៍ដ៏ទៃទៀត អោយស្គាល់ពីតួនាទី ភារកិច្ចរបស់អគ្គលេខាធិការដ្ឋាន។
§ នឹងសហការណ៍រៀបចំមេរៀនជាវីដេអូ តាមប្រព័ន្ធអ៊ីនធើណេត “ E-Learning ” របស់អគ្គលេខាធិការដ្ឋានប្រជាជន នឹងការអភិវឌ្ឍ
ក្នុងគោលបំណងពង្រឹងនិងពង្រីកចំណេះដឹងមន្ត្រីក្រសួង/មន្ទីរផែនការទូទាំងប្រទេស។
§ នឹងបន្តណែនាំឲ្យថ្នាក់ដឹកនាំ និងមន្ត្រីទាំងអស់របស់
អគ្គលេខាធិការដ្ឋានចេះប្រើបច្ចេកវិទ្យាថ្មី សន្និសីទតាមរយៈ វីដេអូ ហៅថា “Video-Conference” ក្នុងគោលបំណងចូលរួមប្រជុំសមាជិកទូទាំងប្រទេសក្នុងពេលតែមួយ
ហើយអាចកាត់បន្ថយ ចំណាយធ្វើដំណើរ ឬសោហ៊ុយផ្សេងៗ។
§
នឹងរៀបចំបោះពុម្ពជាសៀវភៅ
“សន្ទានុក្រមប្រជាសាស្ត្រ” ដើម្បីធ្វើជាស្តង់ដារក្នុងការប្រើប្រាស់រួមគ្នាតែមួយ
ដោយមានការចូលរួមពីអ្នកជំនាញតាមស្ថាប័នដែលពាក់ព័ន្ធ។
§ បន្តពង្រឹងវិន័យផ្ទៃក្នុងដល់មន្រ្តីក្រោមឱវាទរបស់នាយកដ្ឋាននីមួយៗ
ឲ្យយកចិត្តទុកដាក់ក្នុងការបំពេញការងារ និង គោរពពេលម៉ោងធ្វើការ ព្រមទាំងតាមដានសកម្មភាពការងាររបស់ការិយាល័យនីមួយៗ
ហើយនិងការចុះវត្តមាន ប្រចាំថ្ងៃ។
§ បន្តរៀបចំចងក្រងនូវទិន្នន័យដែលពាក់ព័ន្ធនិងប្រជាសាស្ត្រ
រួមមាន បញ្ហាយេនឌ័រ មនុស្សចាស់ សុខភាព បន្តពូជរបស់យុវវ័យ ការអប់រំ
បញ្ហាបំលាស់ទីលំនៅ បញ្ហាគ្រោះថ្នាក់ចរាចរណ៍ ។ល។ ដើម្បីផ្សព្វផ្សាយ។
§ បន្តកិច្ចសហការ
និងសហប្រតិបត្តិការជាមួយស្ថាប័នដែលពាក់ព័ន្ធនឹងបញ្ហាប្រជាជន
ក្នុងន័យធ្វើការផ្សព្វផ្សាយ និងផ្តល់ពត៌មានស្តីពីបញ្ហាប្រជាជនផង
និងធ្វើការស្រាវជ្រាវ ឬប្រមូលទិន្នន័យ/ឯកសារផ្សេងៗទាក់ទងនិងបញ្ហា
ប្រជាជន និងការអភិវឌ្ឍផង
សម្រាប់ទុកជាធាតុចូលក្នុងការចងក្រងទិន្នន័យប្រជាជនសម្រាប់ធ្វើការផ្សព្វផ្សាយ។
§ បន្តពង្រឹងសមត្ថភាពមន្រ្តីតាមការិយាល័យនីមួយៗឲ្យចេះបូកសរុបការងារប្រចាំខែ
ដាក់ជូនប្រធាននាយកដ្ឋានដើម្បីសរុបការងារក្នុងរយៈពេល មួយខែកន្លងមក។
§ បន្តពង្រឹងសមត្ថភាពមន្រ្តីរបស់ អបអ
តាមរយៈការបើកវគ្គបណ្តុះបណ្តាលផ្សេងៗ រួមមាន ភាសាអង់គ្លេស កុំព្យូទ័រ
និងបញ្ហាប្រជាសាស្ត្រជាដើម ។ល។
§ បន្តបើកកិច្ចប្រជុំរួមប្រចាំខែ និងវេទិកាសាធារណៈ របស់អគ្គលេខាធិការដ្ឋានប្រជាជននិងការអភិវឌ្ឍ ព្រមទាំងមានការប្រជុំពិភាក្សាប្រចាំសប្តាហ៍ សម្រាប់ថ្នាក់ដឹកនាំរបស់ អបអ។ |
